vesti24.mk
ЗАБАВА

Кога флертот преминува во нешто посериозно?

ECA

Невиниот и наивен флерт може за миг да премине во нешто посериозно, а границата е толку тенка што некои луѓе несвесно ја преминуваат.

Психологот Сузан Краус Витборн открива кога флертот преминува во нешто посериозно и кога треба да повлечете „рачна кочница“.

Ако одбегнувате да му кажете на партнерот дека сте флертувале со друга личност, треба да се прашате која е вашата причина за тој молк. Или флертот не ви значел ништо или се плашите од реакцијата на партнерот бидејќи сте ја преминале границата на наивен флерт, што не е во ред кога сте во сериозна врска.

Ако долго време флертувате со некој со кој често се гледате, тоа не е проблем сѐ додека тоа се обични шеги и погледи. Но, ако сте почнале да се потпирате на таа личност за емотивна потпора и од неа барате поддршка, а тоа не го барате од партнерот, тогаш е многу веројатно дека сте преминале во „емотивно изневерување“.

Емотивното изневерување е всушност откривање на одредени работи на личноста со која флертувате, а уште не сте му ги откриле на партнерот.

„Често се случува да ве привлече друга личност, но тоа не значи дека врската ви е во криза. Тогаш може само да се прашате што добивате од личноста со која флертувате, а не можете да го добиете од партнерот и дали тоа навистина вреди да ја ризикувате врската“, вели Витборн.

Многу е важно да се биде свесен за себе и своето однесување ако веќе претходно сте биле познати како некој кој често флертува и не може да го посвети вниманието само на една личност. Во тој случај треба да бидете искрени и да не се впуштате во сериозни врски за да не ја повредите личноста која сериозно вложува време и емоции во вас.

Ако со личноста со која флертувате веќе имате интерни шеги што никој друг не ги разбира, тоа би можело да ѝ наштети на вашата врска.

„Замислете да сте во друштво на партнерот и на личноста со која флертувате и со неа да споделувате интерни шеги. Тоа може да ги повреди чувствата на вашиот партнер кој ќе се почувствува изолирано, а можеби и понижено“, вели Витборн.

„Краен стадиум“ е кога почнувате да размислувате за личноста со која флертувате додека сте со партнерот. Тоа е веќе знак дека почнале да се развиваат чувства кон личноста со која флертувате.

Кога ќе ја преминете границата, не се преправајте дека ништо не се случило. Признајте си дека сте се затрескале/заљубиле и размислете дали би имале иднина со таа личност. Не заборавајте дека можно е за личноста со која флертувате вие да сте само флерт и ништо повеќе и можно е вашите чувства да не бидат возвратени.

извор:курир.мк

Loading...

Related posts